கொஞ்ச நேரம்... பொன்னான நேரம்...

"அண்ணேய் எப்படி உங்களாலை டெய்லி ஒரு பதிவு போடமுடிகிறது" , புல்லட்.
"ஓமப்பா எனக்கும் இந்தக் கேள்வி அடிக்கடி வரும்", ஆதிரை.
"எப்படி உங்களுக்கு டைம் கிடைக்குது" ட்விட்டரில் கெளபாய்.
"வந்தி, எப்படியப்பா இப்படி போட்டுத்தாக்குகிறீர்கள், எங்களுக்கு நேரம் கிடைக்காமல் கஸ்டப்படுகின்றோம்", போனில் மருதமூரான்.

இப்படிப் பலர் அடிக்கடி என்னைக் கேட்கும் நேரம் பற்றிய கேள்விக்கான விடைதான் இந்தப் பதிவு.



"Do it Now" என்ற பழமொழியும், "If you waste the time now, time will be waste you one day" என்ற எங்கள் பாடசாலை முன்னாள் அதிபர் W.N.S.சாமூவேல் அவர்களின் அந்த வாசகமும் எனக்கு சின்ன வயதில் இருந்து மனதில் பதிந்துவிட்டது. அதற்காக நான் நேரத்தை விரயமாக்கியதில்லை என நினைக்காதீர்கள். கண்ணைத் துயின்று காலத்தைப்போக்கியவன், போக்குகிறவனில் நானும் ஒருவன். ஆனால் சில விடயங்களைத் திட்டமிடல் மூலம் செய்வதால் நேரப் பிரச்சனை எனக்கு அவ்வளவு ஏற்படுவதில்லை.

அண்மையில் சில நாட்களாகத் தான் பெரும்பாலும் தினமும் ஒரு பதிவு வருகின்றது. கூடுதலாக என் பதிவு காலை வேளைகளில் வரும், எப்படியென்றால் இரவே பதிவை ஆறுதலாக எழுதிவிட்டு, காலையில் கொஞ்சம் அடித்தல்கள், திருத்தல்கள் பலவற்றைச் செய்துவிட்டு வெளியிட்டுவிடுவேன். அதே நேரம் காலையில் நேரம் கிடைத்தால் அடுத்த பதிவை எழுதி Draft ல் போட்டுவிடுவேன், நேரம் கிடைக்கும் போது அதனையும் திருத்தி வெளியிடுவது, இப்படி Draft ல் கிடக்கும் பதிவுகள் பல.

பெரும்பாலனவர்கள் போல நானும் 6 மணி வரை இழுத்துப்போர்த்திக்கொண்டு படுக்கிற ஆள்தான். நித்திரையால் எழும்பியபின்னர் ஒரு 8 மணி வரை நெட்டில் மேய்ந்துவிட்டு புதிய பதிவு இருந்தான் அதனை வெளியிட்டோ, அல்லது தட்டச்சு செய்தோ என் நேரத்தைச் செலவிடுவேன். பெரும்பாலும் காலை வேளைகளில் சிந்தனை( அடப்பாவி மொக்கைப் பதிவுகளுக்கு என்ன சிந்தனை எனக் கேட்பது புரிகிறது) களையாமல் எழுதமுடியும்.

பின்னர் வேலை, ஆணி பிடுங்குதல், அலவாங்கு பிடுங்குதல், ட்விட்டரில் கும்மி என பொழுதுபோகும். இந்த வேளையில் காலையில் வந்த பதிவுகளுக்கு வரும் பின்னூட்டங்களை வெளிவிடுவது வழக்கம், பெரும்பாலும் அந்தப் பின்னூட்டங்களுக்கு பதிலை அதே நாள் இரவில் அல்லது வேறு நேரத்தில் வெளியிடுவது.

இந்தப் பின்னூட்டங்களுக்கு பதில் போடுவதை பெரும்பாலும் நான் விரும்புகின்றேன், காரணம் பெரும்பாலான பின்னூட்டங்களில் நல்ல கருத்துகளைச் சொல்வார்கள், ஆகவே அவர்களுக்குப் பதில் சொல்வது கடமை.

பின்னர் இரவு 8 மணிக்கு விஜய் தொலைக்காட்சியில் கமல் 50 பொன்விழா தொகுப்பு பார்ப்பதும் 9 மணிக்கு சூப்பர் சிங்கர் ஜூனியர் பார்ப்பதும் மட்டும் தான் என் தொலைக்காட்சிப் பொழுதுகள், கிரிக்கெட் போட்டிகள் நடந்தால் அவற்றையும் அம்மாவிடம் பேச்சுவாங்கிக்கொண்டு பார்ப்பேன். இதனால் 10 மணியில் இருந்து நள்ளிரவு வரை இரு மணித்தியாலங்கள் எனக்கு இணையத்தில் நண்பர்களுடன் அரட்டை, அடுத்த பதிவு பற்றிய எண்ணங்கள் என அடுத்த பதிவைத் தயார் செய்துபோடுவேன்.

படுக்கமுன்னர் எப்படியும் ஒரு அரைமணித்தியாலம் ஏதாவது புத்தகம் வாசித்தபடி அப்படியே நித்திரையாகிவிடுவேன். தினமும் ஏதாவது வாசிக்கவேண்டும் சில நாவல்கள் மெஹா சீரியல் போல் இழுபட்டுக்கொண்டே போகும்.

இதுதான் என் தினசரி நடவடிக்கைகள், சனி, ஞாயிறு தினங்களில் பெரும்பாலும் நான் எழுதுவது குறைவு. நண்பர்கள் தொலைக்காட்சி என பொழுதுபோய்விடும்.

இவை அனைத்தும் என்னுடைய சில நாட்களான திட்டமிடலே ஒழிய வேறு ஒன்றும் இல்லை, சில நாட்களுக்கு முன்னர் ஒரு கிழமைக்கு ஒரு பதிவு என்றே போட்டிருந்தேன்.

இடையில் பதிவு எழுத பஞ்சியாக கிடந்தால் படங்கள் போட்டு படம் காட்டுவதும், பாட்டுப்போடுவது, கமல் பற்றிய பதிவுகளும் கைகொடுக்கும்.

சீரியசாக எழுதினால் பலரால் சீண்டப்படுவதில்லை என்பதை ஆழ்ந்த கவலையுடன் தெரிவித்துக்கொள்கின்றேன்.

என்னுடைய திட்டமிடல் போல் நீங்களும் நடந்துகொண்டால் எப்படியும் தினம் ஒரு பதிவு போடலாம்.