கல்லூரிச் சாலையில் சில பசுமை நினைவுகள்

அன்புத் தோழி சினேகிதியின் தொடரோட்டம் ( பள்ளிப் பயின்றதொரு காலம் ). கீத்தின் பதிவில் விட்ட அறிக்கையால் இன்றே எழுதவேண்டிய நிர்ப்பந்தம். அதனை சகோதரப் பாடசாலை மாணவி சாயினி நக்கலும் அடித்திருந்தார். ஆஹா சிங்கம் சிலிர்த்து எழுந்து 15 வருடங்களுக்கு முன்னைய நாட்களை அசைபோடப்போகின்றது.


கல்லூரிச் சாலை இன்பங்கள், துன்பங்கள், ஏன் இரு தடவை மரணத்தைக்கூட எட்டிப்பார்க்க வைத்த சாலை. காலையில் ஆறரை மணிக்கு கலகலக்கும் சாலை மதியம் வரை வெள்ளுடை வேந்தர்களாலும் வெள்ளுடைத் தேவதைகளாலும் அழகாகத் தெரியும் சாலை.

பருத்தித்துறை ஹாட்லிக் கல்லூரியில் ஆண்டு 7 சி தொடக்கம் ஆண்டு 13 சி வரையிலான இனிமையான 8 வருடங்கள் (இடையில் ஒரு 6 மாதம் கொழும்பில் அஞ்ஞாதவாசம் ). சண்டைகள், வட்டவாரியால் குத்தல்கள், நூலகத்தில் வசித்தல், விளையாட்டுப்போட்டிகளில் எங்கள் இல்லத்துக்காக கத்தல்கள், கதறல்கள், மழைக்காலத்தில் நீச்சல்கள், சகோதரப் பாடசாலை மாணவிகளுடன் கொழுவல்கள், ஆசிரியர்களிடம் அடிவாங்கல்கள் என நீண்டுகொண்டு போகும் எங்கள் குறும்புகள்.



ஓஎல் வரை எல்லா ஆசிரியரையும் பிடித்திருந்தாலும் ஏனோ ஏஎல்லில் அவர்களைக் கொஞ்சம் பிடிக்கவில்லை(கண்டிப்பு அதிகமாக இருந்தபடியாலோ தெரியாது).

எங்கள் அதிபர் திரு.பாலசிங்கம்

நாங்கள் பள்ளியில் நுழைந்த போது எங்கள் அதிபர் பாலசிங்கம் சேர்தான், மிகவும் சாந்தமானவர், பெரும்பாலும் கோபப்படாதாவர் ஒருமுறை மட்டும் எங்கள் வகுப்பு மாணவர்களுக்கு பக்கத்து வகுப்புடன் சண்டைபோட்டதற்க்கு நல்ல அடிபோட்டார். பாடசாலையால் விலகியபின்னரும் வழியில் கண்டால் அன்புடன் விசாரிப்பவர்.

செல்வி. ஆறுமுகம் ஆசிரியை.

எங்கள் சமய ஆசிரியை அன்பானவர், என்றைக்கும் மாணவர்களைக் கடிந்ததில்லை. எதனையும் வெட்கப்படாமல் செய்யவேண்டும் என்பார் இதனால் என்னை கொஞ்சக் காலம் தமிழ்த் தினப் போட்டிகளுக்கு பாஓதலுக்கு அனுப்பினார்( நல்லாப் பாடுகின்றவர்கள் வெட்கத்தினால் செல்லவராதபோது) பாடசாலையின் பங்குபற்றல் இருக்கவேண்டும் என என்னை அனுப்பி வட இந்து மகளிர்களிடம் வெற்றிக்கு முதல்படியை அனுபவரீதியாக உணரச் செய்தவர்.

திரு. சர்வானந்தா ஆசிரியர்

கணிதத்தை இலகுவாக சொல்லிகொடுத்தவர். தானும் தன் பாடமும் உண்டென வகுப்புகளில் கற்பித்தல் மட்டுமே செய்தவர். அவரின் பாட நேரம் மட்டும் எந்தவித வேறுகதைகள் பிராக்குகள் இன்றி கணிதமாகவே இருக்கும்.

திரு. இரகுபரன் ஆசிரியர்

பிரெஞ்சு தாடியும் நல்ல உயரமும் கொண்ட எங்கள் விஞ்ஞான ஆசிரியர். எமக்கு விஞ்ஞானம் மட்டுமல்லாமல் ஏனைய விடயங்களான நல்லனவற்றைத் தேடி வாசித்தல், நாடக உத்திகள், உருவக நாடகங்கள் மூலம் உட்கருத்துகள் எனப் பலவற்றைச் சொல்லித் தந்தவர். நல்ல எழுத்தாளரும் கூட. சிறந்த நாடக இயக்குனர். இவரின் தப்பிவந்த தாடி ஆடு என்ற நாடகம் இன்றைக்கும் பாடசாலையில் பிரபலம்.

அடிவாங்கிய சம்பவங்கள் பெரிதாக இல்லை. பெரும்பாலும் உப அதிபர். திரு.பொன்னம்பலம் அவர்கள் வகுப்பில் சத்தம் போட்டால் முன் வரிசையில் அம்ர்ந்திருக்கும் எங்கடை குழுவிற்க்குத் தான் நன்றாக அடிபோடுவார். அதிலும் என்ரை குரல் வைஎம்சிஏ பில்டிங் வரை கேட்கின்றது என எனக்கு ஸ்பெசல் அடி (அந்த பில்டிங்குக்கும் எங்கள் வகுப்பிற்க்கும் இடையில் கிட்டத்தட்ட 200 மீற்றர் தூரம்).

மற்றும் படி ஒருமுறை வகுப்பில் கதைத்தற்க்கு எங்கள் வகுப்பு மாணவர்கள் அனைவரையும் திருமதி.இராமநாதன் ஆசிரியை "நான் இனி வகுப்பில் கதைக்க மாட்டேன்" என 200 முறை எழுதவைத்தார்.

சாரணனாகவும் இருந்ததில் நான் பெரும்பாலும் ஒழுக்கமான மாணவனாகவே பாடசாலை நாட்களில் இருந்தேன், இருந்து வருகின்றேன்.

ரியூசன் ஆசிரியர்களில் எனக்கு ஓஎல் வரை கணிதம் படிப்பித்த அண்மையில் மறைந்த அமரர் விமலன் ஆசிரியரும் மறைந்த கணித வல்லுனர் அமரர்.வெக்டர் வேலாயுதம் ஆசிரியரும் இன்றைக்கும் மனதில் நிற்பவர்கள்.

விமலன் ஆசிரியர் மிகவும் கண்டிப்பானவர் ஆனாலும் எங்களின் மேல் நல்ல அக்கறை உடையவர். இவரினதும் சர்வானந்தா ஆசிரியரினதும் திறமையான கற்பித்தலாலும் அக்கறையாலும் கணித பாடத்தில் விசேட சித்தி அடைய முடிந்தது. இவரின் மறைவு கணித மாணவர்களுக்கு இழப்புத்தான்.

அதேபோல் தான் வெக்டர் சேரும், மாணவர்களைப் பெரிதாக கடியமாட்டார். காரணம் நீங்கள் விடும் பிழைகள் உங்கள் வாழ்க்கையைப் பாதிக்கும் என்பார். இன்றைக்கு அதனை அனுபவிப்பவர்களில் நானும் ஒருவன். இவரின் இழப்பு பேரிழப்புத்தான். அதே நேரம் இவரின் சீடரான பிரேம்நாத் ஆசிரியரிடமும் படித்தேன். மாணவர்களைக் கலகலப்பாகவும் அதே நேரம் கண்டிப்பாகவும் நடத்திய ஆசிரியர். (என்னை விட இவர் பற்றி நண்பர் லோஷனுக்கு அதிகம் தெரியும்).

இவர்கள் மட்டுமல்ல எம்மை ஆளாக்கிய பல ஆசான்கள் இருக்கின்றார்கள் பதிவின் நீளம் காரணமாக அவர்கள் அனைவரையும் எழுதமுடியவில்லை.

பப்பி லவ் கதைகள் காதல் கதைகள் என ஒரு இலவும் இல்லை.

சும்மா எழுந்தமானமாக மூன்று பேரை அழைக்காமல் என்னுடைய பாடசாலையினதும் அருகில் உள்ள பாடசாலைகளான மெதடிஸ், வடமராட்சி இந்து மகளிர் கல்லூரியில் இருந்தும் ஒவ்வொருவரை அழைக்கின்றேன். எனது பாடசாலை மாணவர்களான டொக்டர்.முருகானந்தன், மருதமூரான், கரவைக் குரல், பால்குடி, பனையூரான், கீத், ஆதிரை என நீண்ட பட்டியல் இருப்பதால் குழுக்கல் முறையில் இருவரைத் தேர்ந்தெடுத்துள்ளேன்.

1. மருதமூரான்.
2. சந்திரவதனா அக்கா (வட இந்து)
3. கரவைக் குரல்
4. சாயினி(பாவை) (மெதடிஸ்ட்) (பரீட்சைகள் முடிந்தபின்னர் ஆறுதலாக எழுதவும்).

டிஸ்கி: சனி ஞாயிறுகளில் பதிவு எழுதுவதில்லை என்ற என் வைராக்கியத்தை இன்றைக்கு உடைத்த சினேகிதிக்கு கண்டனங்கள்.