பீட்ஷா, பேர்கர், சிப்ஸ்

புதிய வாழ்க்கை.

கொஞ்சம் கொஞ்சமாக வெயில் வரத்தொடங்கிவிட்டது ஆனாலும் இன்னும் குளிர் குறையவில்லை சென்ற வாரத்தில் அதிகபட்சமாக 16 டிகிரி செல்சியசில் வெப்பம். நாலு ஐந்து உடைகள் என அணிந்தவர்கள் இப்போது ஒவ்வொன்றாக குறைக்கத்தொடங்கிவிட்டார்கள். சமர் தொடங்க அணியும் உடைகளின் அளவும் எண்ணிக்கையும் மாறிவிடும். பெயர் தான் வளர்ச்சியடைந்த நாடு ஆனாலும் களவுகளும் குப்பைகளும் ஆசிய நாடுகளுக்கு நிகரானவைதான், மாயா, கரவைக்குரல் இருவரும் தொடர்புகொண்டார்கள். சதீஸ் வந்தபின்னர் சிலவேளைகளில் நாலுபேர் கொண்ட பதிவர் சந்திப்பு நடைபெறலாம். நீருஜாவும் சந்திப்பு நடத்தவேண்டும் எனப் பதிவு இட்டிருந்தார். காலம் கனிந்தால் லண்டன் பிரிட்ஜில் சந்திக்கலாம்,

எனக்கு ஏனோ இந்த வாழ்க்கை பிடிக்கவில்லை. என் கல்வி முடிய மீண்டும் சொந்தநாட்டுக்கு வந்தாலும் வருவேன் (சிலவேளைகளில் நல்ல எதிர்காலம் கிடைத்தால்(வேலையைத் தான் சொல்கின்றேன்) இங்கே சிலகாலம் வசிக்கலாம் ). உங்கள் வாழ்க்கையில் இதுவரை அடிபடாமல் எந்தவிதமான போராட்டங்களையும் சந்திக்கவில்லையென்றால் நிச்சயம் நீங்கள் வெளிநாடு ஒன்றுக்குச் செல்லுங்கள் வாழ்க்கையின் இன்னும் சிலவிடயங்களை அனுபவிக்கலாம்.

நிலத்தின் கீழ்ச் செல்லும் புகையிரதம், இரட்டைத் தட்டு பேருந்து, அவசர கதியில் உண்ணும் உணவுகள், ஆங்கிலம், பிரெஞ்ச், டொட்ச், ஹிந்தி, தமிழ், மலையாளம், சைனீஸ் என்ற கதம்பமொழிகள் பல நிறமனிதர்கள் என பலவற்றை அனுபவிக்கலாம்.

ஐஸ்லாந்து எரிமலையின் சீற்றம் இங்கிலாந்தை நன்றாகவே பாதித்து விட்டது. வழக்கமாக தலைக்கு மேலால் இடைவெளி இல்லாமல் பறந்து செல்லும் விமானங்கள் கடந்த ஒரு வாரமாக செல்லாமல் வானமே அமைதியாக இருக்க்கின்றது. நேற்று வழக்கம் போல் சேவை மீண்டும் ஆரம்பித்தாலும் இன்னும் வழமைக்குத் திரும்பவில்லை என்பதை வானம் சொல்கின்றது.

எரிமலையால் நம்ம தமிழ்க் கடைகளுக்குத் தான் விற்பனை அதிகம் இலங்கை, இந்தியாபோன்ற நாடுகளில் இருந்து தமிழ் உணவுகள் சில நாட்களுக்கு வராது என்பதால் பலர் கொஞ்சம் அதிகமாகவே வாங்கி ஏற்கனவே நிறைந்துபோயுள்ள குளிரூட்டிகளை நிறைத்து வைத்துள்ளார்கள்.

கிரிக்கெட்

இம்முறை ஐபிஎல் ஒரு விருப்புடன் பார்க்கமுடியவில்லை. கல்வி வேலை என நேரம் போனபடியால் நெட்டில் இடைக்கிடை முடிவுகளை அறிந்துகொண்டேன், சிலவேளைகளில் கங்கோனின் ட்விட்டுகளில் என்ன நடக்கின்றது என்பது நன்றாகபுரிந்தது. மோடியும் சசிதரூரும் மாட்டிக்கொண்டுவிட்டார்கள். இந்தவார விகடனில் மோடி அமெரிக்கா சிறையில் 3 வருடங்கள் இருந்தவர் என்ற மேலதிக விபரம் இருக்கின்றது. எது எப்படியோ மோடி முடிவு செய்தபடி இம்முறை மும்பாய் இந்தியன் கோப்பையை வெல்லும். கிரிக்கெட் சூதாட்டம் போல் மாறிவிட்டது.

சினிமா

சில நாட்களுக்கு முன்னர் என்னுடன் படிக்கும் பாகிஸ்தான் நண்பனுடன் பேசிக்கொண்டிருக்கும் போது இந்திய சினிமாக்கள் பற்றிய பேச்சும் வந்தது, அவர் ஹிந்தி சினிமாவுடன் தமிழில் எங்கள் உலகநாயகன் நடித்த படங்கள் மட்டும் பார்ப்பதாக கூறினார். தசாவதாரம், அவ்வை சண்முகி பல தடவை பார்த்ததாகச் சொல்லும் போது மொழி, தேசம் கடந்து உலகநாயகனின் புகழ் பரவியிருப்பது பெருமையாக இருந்தது.

அண்மையில் கலைஞர் டிவியின் புண்ணியத்தில் மதராசப் பட்டணம் படத்தில் பாடல் வெளியீடு பார்க்க கிடைத்தது. ஆரியாவின் தோற்றம் லகான் அமீர் கானை நினைவுபடுத்துகின்றது. நா.முத்துக்குமாரின் அழகிய தமிழ் வார்த்தைகளை உதித் நாராயணனைக் கொண்டு ஜிவிபிரகாஷ் ஏன் பாடிவித்தாரோ?


குறிப்பு : பல நாட்களுக்கு முன்னர் எழுதியவற்றில் சிலவற்றை நீக்கி சிலவற்றைச் சேர்ந்து பதிவிட்டிருக்கின்றேன். இன்றுதான் கோர்ஸ்வேர்க் முடிந்து கொஞ்சம் நேரம் கிடைத்துள்ளது. அடுத்த பதிவு எப்பவோ?