பாட்டுப் பாட வாவும் அணுவளவும் பயமில்லையும்

விஜய் தொலைக்காட்சி வழக்கம் போல் தங்கள் தனித்தன்மையுடன் புதிய நிகழ்ச்சிகள் இரண்டை இரு வாரங்களுக்கு முன்னர் அறிமுகம் செய்தது. ஒரு நிகழ்ச்சி பாட்டுப் பாட வா இன்னொரு நிகழ்ச்சி அணுவளவும் பயமில்லை

பாட்டுப் பாட வா

பாட்டுப் பாட வா என்பது கோடிஸ்வரன்(குரோர்பதி) நிகழ்ச்சியின் இன்னொரு வடிவமாகும். கோடிஸ்வரனில் கேள்வி கேட்க சரியான பதில் சொல்லவேண்டும் இங்கே ஒரு பாடலைப் பாடும் போது அந்தப் பாடலில் இடையில் விடுபட்ட வரிகளைச் சரியாகப் பாடவேண்டும்.

இந்த நிகழ்ச்சியை பிரபல பாடகி அனுராதா ஸ்ரீராம் அழகாகத் தன்னுடைய ஆட்டம் பாட்டம் பாணியில் தொகுத்து வழங்குகின்றார். பெரும்பாலும் இவர் தமிழிழையே நிகழ்ச்சியைத் தொகுத்து வழங்குவது சிறப்பு.

முதல் வாரத்தில் முதல் நாள் பாடகர் யுகேந்திரனும் பாடகி கல்பனாவும் கலந்துகொண்டு மூன்று சுற்றுகளுடன் வெளியேறினார்கள். அடுத்த நாள் பாடகர் சத்யா மிகவும் திறமையாகப் பாடி ஆறு சுற்றுவரை வெற்றிகரமாக முன்னேறி ஏழாவது சுற்றில் ஒரு லட்சத்து இருபத்தையாயிரம் ரூபா பரிசுடன் வெளியேறினார்.

கடந்த வாரம் பாடகர் பிரசன்னா வந்தார். அன்றைக்குத் தான் நிகழ்ச்சிக்கு சனியன் பிடித்தது. நல்ல பாடகர் வளர்ந்துவரும் பாடகர் பிரசன்னா ஆனால் தேவையில்லாமல் அனுராதாவுடன் வழிந்ததும் சில கருத்துக்களைச் சொல்கின்றேன் என பாடல் ஆசிரியர்களை இகழ்ந்ததும் இந்த நிகழ்ச்சிக்கு கறுப்பு புள்ளியாகிவிட்டது. வந்தோமோ பாடினோமா வென்றோமா என இருக்காமல அதிகமாக அலட்டியது கண்டிக்கத் தக்கது.

அவரது வெளியேற்றத்தின் பின்னர் நடிகை அபிராமி(தமிழ் நன்றாகத் தெரிந்த நடிகை) வந்தார். நன்றாக வார்த்தைகளை நினைவில் வைத்திருக்கின்றார். ஓரளவு ஸ்ருதி சுத்ததுடன் (இலங்கையில் மீண்டும் ஸ்ருதியைத் தேடித் திரிகிறார்கள்) பாடினார். மூன்று சுற்றுகளை வென்று அடுத்த சுற்றுக்கு அடுத்த வாரம் வரை காத்திருக்கின்றார்.

மேலதிக தகவல் : இந்த நிகழ்ச்சிக்காக அமைக்கப்பட்ட அரங்கம் எரிந்து பக்கத்தில் இளையதளபதி விஜயின் வேட்டைக்காரன் அரங்கத்தையும் எரித்துவிட்டதாம். அரங்கம் எரிந்ததானல் படம் ஓடாதோ என விஜய் செண்டிமெண்டாக கவலைப்பட்டாராம். (இல்லாவிட்டால் மட்டும் ஓடுமோ என யாரோ கேட்பது புரிகிறது).

அணுவளவும் பயமில்லை

காபி வித் அனுவை நிறுத்திவிட்டு(சகலரையும் பேட்டி எடுத்துவிட்டார்கள் என நினைக்கின்றேன்) அனுஹாசன் தலைமையில் ஏழு பெண்கள் செய்யும் சாகசங்கள் தான் இந்த நிகழ்ச்சி.



தாரிகா( நாட்டுச் சரக்கு புகழ்), குட்டிப் பூஜா(ஏன் இவர் இப்போ சீரியல்களில் அழுவதில்லை), சந்தோஷி( சினிமாவில் கதாநாயகிகலாம்), குண்டு ஆர்த்தி (இவர் சாகசம் செய்தாலும் சிரிப்புத் தான் வருகிறது), உஜ்ஜைனி(பாடகி), பூஜா(எஸ் எஸ் மியூசிக் தொகுப்பாளினி), சான்ட்ரா( சன் மியூசிக் புகழ் பிரஜினின் மனைவி)ஆகிய ஏழுபேரும் செய்யும் சாகசங்கள் தான் இந்த நிகழ்ச்சி இந்த நிகழ்ச்சியிலும் வெளியேற்றம்(எலிமினேசன்)இருக்காம்.

முதல் வாரத்தில் இவர்கள் அனைவரும் தமிழ்நாடு போலீஸ் அக்கடமியில் பயிற்சி செய்தார்கள். அதில் பூஜாவும் உஜ்ஜைனியும் கயிற்றில் இருந்து பாய்ந்ததில் காயமடைந்தார்கள், அவர்கள் மருத்துவமனையில் சிகிச்சை பெறுவதையும் மருத்துவர் அவர்களின் எக்ஸ் ரே ரிப்போர்ட் பற்றிச் சொல்வதைக்கூட காட்டினார்கள். ஆனால் அடுத்த நாள் அவர்கள் இருவரும் எந்தவித காயமும் இன்றி மீண்டும்வந்தார்கள்.

சென்ற வாரம் பாம்புகளுக்கு மத்தியில் படுத்து பார்ப்பவர்களைக் கிலி கொல்லச் செய்தார்கள்.



முதலில் அனைவரும் பயந்தார்கள், தாரிகாதான் துணிவுடன் சென்று அந்தக் கணாடிப்பெட்டிக்குள் படுத்திருந்தார். அவரின் முகத்தை இன்னொரு கண்ணாடித் துண்டால் பிரித்துவிட்டு அவரின் உடல் மேல் கிட்டத்தட்ட 30 பாம்புகளுக்கு மேல் விட்டு கண்ணாடியால் மூடினார்கள்.

போட்டிக்காக இவர்களுக்கு கொடுத்த நேரம் ஒரு நிமிடம் தான் ஆனால் அவர்கள் விரும்பிய வரைக்கும் பாம்புகளுடன் இருக்கலாம். யாரோ ஒருவர் கிட்டத்தட்ட 27 நிமிடங்கள் இருந்ததாக காட்டினார்கள்.

பெண்களுக்கு துணிவு தேவைதான் அதற்காக இந்த உயிர் போகும் விடயங்களில் ரிஸ்க் எடுக்கலாமா? சிலவேளைகளில் இவர்கள் வடிவேலுவைப் போல் ரிஸ்க் எடுப்பதை ரஸ்க் சாப்பிடுவதுபோல் நினைக்கின்றார்களோ.