ஹாட் அண்ட் சவர் சூப் 25-11-2009

பதிவர் சந்திப்பு

மீண்டும் இன்னொரு இலங்கைத் தமிழ்ப் பதிவர் சந்திப்பு. கடந்த ஆகஸ்ட்டில் சந்தித்த நாம் மீண்டும் எதிர்வரும் டிசம்பர் 13 ல் சந்திக்கவிருக்கின்றோம். முதலாவது சந்திப்பில் அறிமுகங்களும் சில கலந்துரையாடல்களும் மட்டும் இடம் பெற்றதால் இந்தமுறை மேலும் பல கலந்துரையாடல்களை ஏற்பாட்டுக் குழுவினர் ஏற்பாடு செய்துள்ளார்கள்.

அடிக்கடி சந்தித்தால் சுவாரசியம் குறைந்துவிடும் என்பதால் தான் 4 மாதத்திற்க்குப் பின்னர் ஏற்பாடு செய்திருக்கின்றார்கள் என்பது பதிவுலகில் நீண்டகாலம் இருக்கும் பதிவர்களுக்கு புரியும்.

இடம் : தேசிய கலை இலக்கியப் பேரவை, வெள்ளவத்தை (ரொக்சி திரையரங்கு முன்னால்)
காலம் : மார்கழி பதின்மூன்று, மாலை இரண்டு மணி, ஞாயிற்றுக் கிழமை ( 13-12-2009 )

ஏற்கனவே அறிமுகமான நண்பர்களை மீண்டும் சந்திக்கபோகின்றோம் என்பதனால் அந்த நாள் உடனே வராதா? என ஆவலுடன் எதிர்பார்க்கின்றேன். சந்திப்புத் தொடர்பான மேலதிக விபரங்கள் அடுத்த பதிவில் நாளை வரும்.

மழையோ மழை

கடந்த சில நாட்களாக பெரும்பாலும் இலங்கை முழுவதும் மழை கொட்டோ கொட்டென்று கொட்டித்தீர்த்துள்ளது. இதனால் தலைநகர் கொழும்பில் சில இடங்களில் வெள்ளம் வழமைபோல் தேங்கி நின்றது. டெங்கு, சிக்குன் குனியா போன்றவற்றின் உரிமையாளர்களான நுளம்புகளுக்கு வாடகையற்ற குடியிருப்பாக இந்தப் பகுதிகள் மாறிவிட்டன.

குறிப்பாக கொட்டாஞ்சேனையில் புளுமென்டல் வீதி, தொடர்மாடிகள், ஹெட்டியாவத்தை சந்தியும் அதனை அண்டியபகுதியும், ஜெம்பட்டா வீதி, மோதரையில் பல வீதிகள், வெள்ளவத்தையில் சில வீதிகள் நீரினுள் மூழ்கின. ஒவ்வொரு முறை பெரு மழை பெய்யும் போது இந்த நிலமை ஏற்படுவது வழக்கம் ஆனாலும் ஒவ்வொரு தரமும் இந்தப் பகுதிகளுக்கான மாகாணசபை, மாநகர சபை அங்கத்தவர்கள் இதனைச் சீர் செய்து தருவோம் என உறுதியளிப்பார்கள் ஆனால் பின்னர் மறந்துவிடுவார்கள் (மக்களும் தான்). இம்முறை ஜெம்பட்டா வீதி மக்கள் வீதியில் இறங்கி ஆர்ப்பாட்டம் கூடச் செய்தார்கள். தேர்தல் நேரத்தில் தட்டிகள், சுவரொட்டிகள், வண்ணத் தோரணங்கள் அமைக்கும் பணத்தில் ஒரு தொகைப் பணத்தை வெள்ளத்தைத் தடுக்கப் பயன்படுத்தினால் மக்களுக்கு பேருதவியாக இருக்கும், செய்வார்களா?

ஈரம்

எத்தனையோ நாட்களாக பார்க்க முனைந்தும் பார்க்கமுடியாமல் போன ஈரம் திரைப்படம் ஒருமாதிரி நேற்று சிடியில் பார்த்துமுடித்துவிட்டேன். நீண்ட நாட்களின் பின்னர் நல்லதொரு திரில்லர் படம். ஆனாலும் இடையில் அமானுஷ்யத்தைப் புகுத்தி கொஞ்சம் குழப்பிவிட்டார்கள். ஆவிக்குப் பதிலாக கதாநாயகியின் சகோதரியோ அல்லது தந்தையோ கொலை செய்திருந்தால் நம்பகத் தன்மை அதிகரித்திருக்கும்.

இப்படியான நல்ல சில திரைப்படங்களை ஏன் எங்கள் தியேட்டர்களில் வெளிவிடுவதில்லை.

கோலங்கள்

நேற்றுடன் எத்தனையோ குடும்பப் பெண்கள் நீண்ட பெருமூச்சு விட்டிருப்பார்கள். காரணம் கோலங்கள் மெஹாஹாஹா தொடரின் வில்லன் ஆதியை காவல்துறை கைது செய்து நீதிமன்றத்தில் ஒப்படைத்துவிட்டார்கள். ஆனாலும் தொடரை இன்னும் நீட்டிப்பதற்காகவோ என்னவோ ஆதி நீதிபதியை துப்பாக்கி முனையில் எத்தனையோ காவலர்கள் மத்தியில் கடத்திக்கொண்டுபோய்விட்டார்.

நீதிமன்றக் காட்சியில் அவர் அமைதியாக நிற்கவே அம்மாவிடம் சொன்னேன் "பாருங்கள் ஆதி சிலரைச் சுட்டுவிட்டு எப்படியும் தப்பிப்பான்" என, நான் சொன்னபடியே நடந்துவிட்டது. அனைவராலும் அடுத்து இதுதான் நடக்கபோகின்றது என்ற திரைக்கதை தொல்காப்பியனின் 6 வருடகால கோலங்கள் தொடரின் அனுபவத்தைக் கேள்விக்குறியாக்குகின்றது. எது எப்படியோ இன்னும் சில நாட்களில் இந்த தொடர் முடிந்துவிடும் என நினைக்கின்றேன்.

பின்குறிப்பு : சூப்பர் சிங்கர் ஜூனியர்ஸ் பார்க்கின்ற நாம் முந்தநாள் விளம்பர இடைவேளையின் போது தட்டிக்கொண்டிருக்க சன்னில் கோலங்கள் உச்ச கட்டம் நடந்தது அதனால் தான் கோலங்கள் கொடுமையை பல வருடங்களுக்குப் பின்னர் பார்த்தது.

கிரிக்கெட்

அஹமதபாத் டெஸ்ட் போட்டி சில சர்ச்சைகளுடன் வெற்றி தோல்வி இன்றி முடிவடைந்துவிட்டது. அதே நேரம் கான்பூரில் நேற்றுத் தொடங்கிய இரண்டாவது டெஸ்ட்டில் இலங்கை அணியை இந்திய அணி புரட்டி எடுத்துவிட்டது என்றே சொல்லவேண்டும். குறிப்பாக சுழல் பந்து வீச்சாளர்களை இந்திய வீரர்கள் நோகடித்துவிட்டார்கள். மிகவும் குறைந்த ஓட்டவீதத்தை கொடுத்த அஞ்சலோ மத்யூசை ஏனோ சங்ககாரா அடிக்கடி பயன்படுத்தவில்லை. மூன்று சுழல் பந்து வீச்சாளர்களுக்குப் பதிலாக 2 பேரை எடுத்திருக்கலாம். ஆனாலும் முரளில் தன் சுழல் மூலம் 2 விக்கெட்டுகளை எடுத்து இனியும் முரளி அணியில் தேவையா? என எழுதும் ஆங்கிலப் பத்திரிகைகளுக்கு பதிலடி கொடுத்திருக்கின்றார்.

நியூசிலாந்தில் நடைபெறும் நியூசிலாந்து, பாகிஸ்தான் அணிகளுக்கிடையிலான முதலாவது டெஸ்டில் நியூசிலாந்து அணித் தலைவர் டேனியல் வெட்டோரி 8 இலக்க வீரராக களம் இறங்கி அதிக ஓட்டம் பெற்ற வீரர் என்ற சாதனையை இன்று புரிந்துள்ளார். ஏற்கனவே ஷேர் வோர்னிடம் இருந்த 2005 என்ற ஓட்டங்களை இன்று தனது 95 ஆவது போட்டியில் வொட்டோரி கடந்தார். அத்துடன் வொட்டோரிக்கு இந்த மைல் கல்லைக் கடக்க வெறும் 57 இனிங்ஸ் மாத்திரமே தேவைப்பட்டது.

எட்டாம் இலக்க துடுப்பாட்டத்தில் பிரகாசித்தவர்களில் முன்வரிசையில் இருப்பவர்கள் அனைவரும் கிரிக்கெட் ஜாம்பவான்களாகும். வொட்டோரி, வோர்ன், சமிந்த வாஸ், ஷோன் போலக், கபில் தேவ், மல்கம் மார்ஷல், வாசிம் அக்ரம், அனில் கும்ளே,சேர் ரிச்சர்ட் ஹட்லி, மார்க் பவுச்சர்.



பின் குறிப்பு : கடந்த 10 நாட்களாக என்னிடம் இருந்து எந்தப் பதிவும் வராததையிட்டு மின்னஞ்சல் மூலமும், தொலைபேசி மூலமும் என்னைத் தேடிய நண்பர்களுக்கு நன்றிகள். பல ஆணிகள், அலவாங்குகள் இருந்தபடியால் வரமுடியவில்லை. அத்துடன் ஒரு கொழும்பிலிருந்து இன்னொரு பிரதேசத்தில் சில நாட்கள் நின்றபடியால் எதுவும் எழுதமுடியவில்லை. அந்த அனுபவங்கள் விரைவில்.